சிவகாசியில் மீண்டும் பட்டாசு தொழிற்சாலையில் தீ விபத்து***வங்கதேசம் சென்றார் வெளியுறவுத்துறை அமைச்சர் சுஷ்மா சுவராஜ் *** இந்தியாவிற்கான புதிய தூதர் நியமனம்.*** சிலிண்டர் விலை உயர்வு இல்லை - மத்திய அரசு தீடீர் முடிவு *** துணை அதிபர் ஹமீது அன்சாரி சீனா பயணம்

Pages

19 Sep 2015

செப்.19: வானையே வீடாக்கிய விண்வெளி வீராங்கனை சுனிதா வில்லியம்ஸ் பிறந்த தின சிறப்பு பகிர்வு

இரவு நேர வானத்தை அண்ணாந்து பார்த்துக் கொண்டிருந்தாலே நமக்கு நேரம் போவது தெரியாது. அங்கேயே கொஞ்ச நாட்கள் தங்கியிருக்கும் வாய்ப்பு கிடைத்தால்... இந்திய வம்சாவளியைச் சேர்ந்த சுனிதா வில்லியம்ஸ் அந்த அதிர்ஷ்டசாலிகளுள் ஒருவர்.

‘சர்வதேச விண்வெளி நிலையம்’ - பூமியில் இருந்து 320 கி.மீட்டர் உயரத்தில் சுமார் 5 லட்சம் கோடி ரூபாய் செலவில் அமெரிக்கா, ரஷ்யா போன்ற நாடுகளின் கூட்டு முயற்சியில் விண்வெளியில் கட்டப்படும் பிரமாண்டமான விண்ணுலக வீடு. இந்தச் சாதனையில் இந்தியாவின் பங்கும் குறிப்பிடத்தக்கது.

சர்வதேச விண்வெளி நிலையத்தின் கட்டுமானப் பணிகளுக்காக இதுவரை இந்திய வம்சாவளியைச் சேர்ந்த இருவர் விண்வெளியில் பயணம் செய்துள்ளனர்.


ஒருவர் மறைந்த விண்வெளி வீரர் கல்பனா சாவ்லா. இன்னொருவர் சுனிதா வில்லியம்ஸ். (இந்திய வம்சாவளியைச் சேர்ந்த கல்பனா சாவ்லாவுக்குப் பிறகு விண்வெளிப் பயணம் மேற்கொண்ட இரண்டாவது பெண்மணி என்ற பெருமை சுனிதாவுக்கு உண்டு.)

குஜராத் மாநிலத்தை பூர்வீகமாகக் கொண்டவர் தீபக் பாண்ட்யா. அமெரிக்காவில் குடியேறிய மருத்துவர். இவரது மூன்றாவது மகள்தான் சுனிதா. சுனிதாவின் கணவர் பெயர் மைக்கேல் ஜே. வில்லியம்ஸ்.

1965-ஆம் ஆண்டு செப்டம்பர் 19-ம் தேதி அமெரிக்காவின் ஓஹாயோ மாநிலத்தில் யூக்ளிட் என்ற இடத்தில் பிறந்தார் சுனிதா. சுட்டியாக இருக்கும்போதே விண்வெளியில் பறக்க வேண்டும் என்ற ஆசை சுனிதாவுக்கு.

கல்லூரியில் இயற்பியல் பட்டம் பெற்ற சுனிதா அமெரிக்கக் கடற்படையில் சேர்ந்தார். சில மாதங்களிலேயே கடற்படை விமானி ஆனார். இதனால் சுனிதா தரையில் இருந்த நேரத்தைவிட வானில் பறந்த நேரம்தான் அதிகம். ஆம்! 8 ஆண்டுகளில் 30 வகை விமானங்களை ஓட்டிய சுனிதா, 2,770 மணி நேரங்கள் வானில் பறந்து சாதனை படைத்தார்.

வேலையில் இருந்து கொண்டே பொறியியல் பிரிவில் முதுகலைப் பட்டம் பெற்றார் சுனிதா. இதைத் தொடர்ந்து 1998-ஆம் ஆண்டு அமெரிக்காவின் நாசா விண்வெளி ஆய்வு மையத்தில் பயிற்சி விண்வெளி வீரராகத் தேர்வு செய்யப்பட்டார். கடுமையான பயிற்சிகளையும் விரைவாக முடித்து சிறந்த விண்வெளி வீரர் ஆனார்.

இதனால் சர்வதேச விண்வெளி நிலையத்துக்குச் சென்று பணியாற்றும் அதிர்ஷ்ட வாய்ப்பை சுனிதாவுக்கு வழங்கி கௌரவித்தது நாசா.

2006-ஆம் ஆண்டு டிசம்பர் மாதம் 9-ம் தேதி இரவு 8.47 மணிக்கு அமெரிக்காவின் கென்னடி விண்வெளி மையத்தில் இருந்து கம்பீரத்துடன் சீறிப்பாய்ந்தது டிஸ்கவரி விண்கலம்.

பாரதி கண்ட புதுமைப் பெண்ணாய், விமானப் பொறியாளர் என்ற அந்தஸ்துடன் சர்வதேச விண்வெளி நிலையத்தை இரண்டு நாள் பயணத்துக்குப் பின் அடைந்தார் சுனிதா. அவருடன் பயணம் செய்த 7 பேரும் சர்வதேச விண்வெளி நிலையத்தில் இருந்து நீல நிறத்தில் விண்ணில் மிதந்து கொண்டிருந்த நம் பூமி பந்தைப் பார்த்து ரசித்தனர்.

இந்த மகிழ்ச்சியை தன் வீட்டுக்குப் போன் செய்து பெற்றோருடன் பகிர்ந்து கொண்டார். விண்வெளி நிலைய கட்டுமானப் பணிகளில் சிறப்பாகவும் பணியாற்றினார் சுனிதா. இதற்காக 4 முறை விண்வெளியில் நடந்து சென்று புதிய சாதனையையும் படைத்தார். மொத்தம் 12 மணி நேரம் 55 நிமிடங்கள் விண்வெளியில் நடந்தார் சுனிதா. இதுவரை யாரும் நிகழ்த்திடாத அரிய சாதனை இது.


இது தவிர விண்வெளியில் இருந்தபடியே அமெரிக்காவின் பாஸ்டன் நகரில் நடந்த மாரத்தான் ஓட்டப்பந்தயத்தில் கலந்து கொண்டார் சுனிதா. ஆச்சர்யமாக இருக்கிறதா..?!

விண்வெளி நிலையத்தில் நடைபயிற்சி செய்யும் ‘டிரெட் மில்’ இயந்திரத்தில் இருந்தே மாரத்தான் போட்டியில் பங்கேற்றார் சுனிதா. பூமியில் மாரத்தான் போட்டி தொடங்கியதும், டிரெட் மில்லில் ஓடுவதற்கு ஆரம்பித்தார் சுனிதா.
பாஸ்டன் நகர் மாரத்தான் ஓட்டப் பந்தயத்தின் மொத்த தூரம் 42 கி.மீட்டர். இதை 8 மணி நேரத்தில் ஓடிக் கடந்தார் சுனிதா. பூமியில் இருந்து 210 கி.மீட்டர் உயரத்தில் சுற்றிக் கொண்டிருந்த சர்வதேச விண்வெளி நிலையத்தில் இருந்து கொண்டே இந்த புதிய சாதனையை செய்தார் சுனிதா. ஓட்டப்பந்தய தூரத்தை சுனிதா ஓடிக் கடப்பதற்குள் இரண்டு முறை பூமியை வலம் வந்துவிட்டது சர்வதேச விண்வெளி நிலையம்.

மே 30-ம் தேதி பெல்ஜியத்தில் உள்ள செயின்ட் மேரி பள்ளி மாணவர்களுடன் விண்வெளியில் இருந்து ரேடியோ மூலம் தொடர்பு கொண்டு பேசினார் சுனிதா. விண்வெளியைப் பற்றியும், சர்வதேச விண்வெளி நிலையத்தில் தனது அனுபவங்களைப் பற்றியும் சுட்டிகளுடன் பகிர்ந்து கொண்டார்.

விண்வெளியில் அதிக நாட்கள் தங்கியிருந்தது, மாரத்தான் போட்டியில் கலந்து கொண்டது, விண்வெளியில் இருந்து போன் செய்து மற்றவர்களுடன் பேசியது, விண்ணில் அதிக நேரம் நடந்தது என்று அடுக்கடுக்கான சாதனைகளைச் செய்து நம் இந்தியாவுக்குப் பெருமை சேர்த்த சுனிதா விரைவில் பூமிக்குத் திரும்பினார். வானையே வீடாக்கி சாதனைகள் பல புரியும் சுனிதாவுக்கு பிறந்தநாள் வாழ்த்துகள் சொல்வோம்.


No comments:

Post a Comment